မြန်မာနိုင်ငံအတွက် ဥပဒေကြမ်း ၃ ခုကို အမေရိကန် အောက်လွှတ်တော် နိုင်ငံခြားရေးကော်မတီနှင့် ဘဏ္ဏာရေး ကော်မတီ က အတည်ပြုလိုက်ကြောင်း သိရသည်။
ဥပဒေကြမ်း ၃ ခု မှာ “BRAVE မြန်မာဥပဒေကြမ်း”၊ “မြန်မာ GAP ဥပဒေကြမ်း” နှင့် “မြန်မာဘဏ္ဍာရန်ပုံငွေ အသစ်မရနိုင်ရေး ဥပဒေကြမ်း” များဖြစ်ပြီး ဇူလိုင်လ ၂၂ ရက် က အတည်ပြုလုပ်ခြင်း ဖြစ်ကြောင်း သိရသည်။
BRAVE မြန်မာဥပဒေကြမ်းမှာ မြန်မာ အစိုးရအတွက် ရန်ပုံငွေရှာဖွေပေးနေသည့် အရင်းအမြစ်ကို ဖြတ် တောက်ပြီး လေကြောင်း တိုက်ခိုက်မှု လုပ်နိုင်စွမ်းကိုလည်း ကျဆင်းစေမည် ဖြစ်ကြောင်း အမေရိကန် လွှတ်တော်အမတ် ဘေလ်ဟိုင်ဇင်ဂါ က ပြောကြားထားသည်။
“ရီပတ်ပလီကန်နဲ့ဒီမိုကဒီမိုကရက်တစ် ပါတီနှစ်ခုက ပေါင်းပြီးတင်တာ။ အောက်လွှတ်တော်က အတည်ပြုတာမဟုတ်ဘူး၊ ကော်မတီက အတည်ပြုတာပဲ ဖြစ်တယ်။ ဆိုတော့ ဒါက တော်တော် အရေးမကြီးသေးတဲ့အဆင့်ပဲ။ ဒီရက်ပိုင်းမှာ စိတ်ဝင်စားစရာက စီးပွားရေးလုပ်ငန်းရှင် ၃ ယောက်ကို စီးပွားရေးပိတ်ဆို့တာ sanction လုပ်ထားတာကိုပြန်ဖွင့်ပေးတဲ့ ကိစ္စမျိုးက ပိုပြီး ဟော့နေတာလေ။ အဲဒီ ဥပဒေ ကိစ္စကို ပြောရင်တော့ ပြောဖို့တောင် အချိန်က စောနေသေးတယ်။ ဘာလို့လဲဆိုတော့ အောက်လွှတ်တော်က ကော်မတီတချို့ကပါ အတည်ပြုမှဖြစ်မှာလေ။ ဥပမာ နိုင်ငံခြားရေးကော်မတီတို့၊ စီးပွားရေးကော်မတီတို့ အဲလိုပေါ့။အဲလိုကော်မတီတွေက သဘောတူမှ အောက်လွှတ်တော်က အတည်ပြုပြီး မှ အထက်လွှတ်တော်ကို တင်၊အထက်လွှတ်တော်မှာ အတည်ပြုပြီးမှ ဖြစ်မှာလေ။အဲဒီအဆင့်တွေကို ကျော်ဖို့ ကျန်သေးတယ်”ဟု နိုင်ငံရေးလေ့လာသုံးသပ်သူတစ်ဦးက ပြောသည်။
အမေရိကန် ဘဏ္ဍာရေးဝန်ကြီးဌာနအနေနှင့် စီးပွါးရေးပိတ်ဆို့မှုစာရင်းတွင် ထည့်သွင်းထားသည့် KT Services & Logistics လုပ်ငန်းနှင့် တည်ထောင်သူ ဦးဂျော်နသန် မျိုးကျော်သောင်း၊ MCM Group လုပ်ငန်းနှင့် ပိုင်ရှင် ဦးအောင်လှိုင်ဦး၊ Suntac Technologies နှင့် ပိုင်ရှင် ဦးစစ်တိုင်းအောင်အပါအဝင် နောက်ထပ် စီးပွါးရေးသမားတဦးဖြစ်သည့် ဒေါ်တင်လတ်မင်းတို့အား ဇူလိုင်လ ၂၄ ရက်တွင် အရေးယူပိတ်ဆို့မှုစာရင်းမှ ပယ်ဖျက်ပေးခဲ့သည်။
အထက်ပါ လုပ်ငန်းနှင့် လူပုဂ္ဂိုလ်များအား ပိတ်ဆို့မှုစားရင်းမှ ပယ်ဖျက်ပေးလိုက်သည့်အကြောင်းရင်းနှင့်ပတ်သက်၍ အမေရိကန် ဘဏ္ဍာရေးဝန်ကြီးဌာနက ထုတ်ဖော်ပြောဆိုခြင်းမရှိသေးချေ။
VOM Telegram Channel: https://t.me/VOMNEWS2023/14975
VOM Viber Channel: https://invite.viber.com/…
VOM Youtube Channel: https://www.youtube.com/channel/UCMHge_I_r2t4sISomPm392g
VOM Website Link: https://voiceofmyanmarnews.com/….
#voiceofmyanmar #VOM #အမေရိကန်လွှတ်တော် #မြန်မာနိုင်ငံအတွက်ဥပဒေကြမ်း
မြန်မာနိုင်ငံအတွက် ဥပဒေကြမ်း ၃ ခု အမေရိကန် လွှတ်တော်ကော်မတီများ အတည်ပြု
